ສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງ ເຕັກໂນໂລຊີ ແລະ ການສື່ສານ ຮ່ວມກັບ ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ - ປາຊີຟິກ ໄດ້ເປີດຊຸດຝຶກອົບຮົມ ການຫັນເປັນດິຈິຕອນ ແລະ ຄວາມປອດໄພຂໍ້ມູນຂ່າວສານ (National Training on Digital Transformation and Information Security and Privacy) ໃນວັນທີ 19 ກັນຍາ 2023, ທີ່ ໂຮງແຮມ ລາວພລາຊາ, ນະຄອນຫຼວງວຽງຈັນ ໂດຍໃຫ້ກຽດເປັນປະທານກ່າວເປີດຂອງທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ, ມີທ່ານ ໂຄ ຄີຢອງ, ຜູ້ອໍານວຍການ ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ - ປາຊີຟິກ ພ້ອມດ້ວຍທີມງານ ແລະ ຄູຝຶກ, ບັນດາຄະນະກົມທຽບເທົ່າ ພາຍໃນກະຊວງ ເຕັກໂນໂລຊີ ແລະ ການສື່ສານ ພ້ອມທັງຜູ້ເຂົ້າຮ່ວມຝຶກອົບຮົມຈາກຂະແໜງເຕັກໂນໂລຊີ ແລະ ການສື່ສານ ແລະ ຂະແໜງການອື່ນອ້ອມຂ້າງກະຊວງ ເຂົ້າຮ່ວມ 80 ກວ່າຄົນ.

ຈຸດປະສົງຂອງການຈັດຝຶກອົບຮົມໃນຄັ້ງນີ້ແມ່ນ ເພື່ອໃຫ້ຜູ້ເຂົ້າຮ່ວມໄດ້ເຂົ້າໃຈເລິກເຊິ່ງກ່ຽວກັບການຫັນເປັນດິຈິຕອນ ແລະ ຄວາມປອດໄພຂໍ້ມູນຂ່າວສານ ເພື່ອຍົກສູງຄຸນນະພາບຂອງການປົກຄອງ ແລະ ການບໍລິຫານສາທາລະນະ. ຊຶ່ງເນື້ອໃນການຝຶກອົບຮົມໃນຄັ້ງນີ້ ແມ່ນຈະໄດ້ສຸມໃສ່ຫຼັກການທີ່ສໍາຄັນສໍາລັບການສ້າງຍຸດທະສາດ ແລະ ນະໂຍບາຍຂອງລັດຖະບານດິຈິຕອນທີ່ມີປະສິດທິພາບ, ຄວາມຕ້ອງການສໍາລັບຍຸດທະສາດທີ່ໄລຍະຍາວສໍາລັບການລິເລີ່ມການຫັນເປັນດິຈິຕອນ ລວມທັງໂຄງລ່າງພື້ນຖານດ້ານດິຈິຕອນ, ການບໍລິການທາງດິຈິຕອນ, ການສ້າງຄວາມສາມາດ ແລະ ນະໂຍບາຍ ລະບຽບການ ແລະ ສ້າງຄວາມຮູ້ ທັກສະທີ່ຈໍາເປັນ ເພື່ອແກ້ໄຂສິ່ງທ້າທາຍທີ່ເກີດຈາກການຫັນເປັນດິຈິຕອນ ຄຽງຄູ່ໄປກັບການປົກປ້ອງຄວາມປອດໄພຂອງຂໍ້ມູນຂ່າວສານແຫ່ງຊາດໃຫ້ມີປະສິດທິ ພາບ ແລະ ມີປະສິດທິຜົນຫຼາຍຂຶ້ນ. ການຝຶກອົບຮົມນີ້ ຍັງເປັນການເພີ່ມທະວີການພົວພັນຮ່ວມມືກັບອົງການຈັດຕັ້ງສາກົນ ກໍຄື ສູນຝຶກອົບຮົມເຕັກໂນໂລຊີການສື່ສານ ແລະ ຂໍ້ມູນຂ່າວສານ ເພື່ອການພັດທະນາ ອາຊີ-ປາຊີຟິກ ໃນການສົ່ງເສີມຫັນເປັນດິຈິຕອນຂອງ ສປປ ລາວ ອີກດ້ວຍ.

ຊຸດຝຶກອົບຮົມດັ່ງກ່າວ, ຈະໄດ້ດຳເນີນໄປເປັນເວລາ 04 ວັນ ເລີ່ມແຕ່ວັນທີ 19-22 ກັນຍາ 2023 ຊຶ່ງຜູ້ເຂົ້າຮ່ວມຈະໄດ້ຮັບຟັງການນໍາສະເໜີຫຼາຍຫົວຂໍ້ທີ່ສໍາຄັນ ເຊັ່ນ: ເຕັກໂນໂລຊີດິຈິຕອນໃນຊີວິດປະຈໍາວັນ, ວິທີການອອກແບບສໍາລັບລັດຖະບານດິຈິຕອນ, ຍຸດທະສາດຂອງລັດຖະບານດິຈິຕອນ, ການຈັດຕັ້ງປະຕິບັດໂຄງການ ແລະ ໂຄງການຂອງລັດຖະບານດິຈິຕອນ, ເຕັກໂນໂລຊີທີ່ພົ້ນເດັ່ນ, ການປະຕິຮູບຂອງລັດຖະບານດິຈິຕອນ, ຄວາມຕ້ອງການຄວາມປອດໄພຂໍ້ມູນຂ່າວສານ, ທ່າອ່ຽງຄວາມປອດໄພຂໍ້ມູນຂ່າວສານ ແລະ ທິດທາງ, ກິດຈະກໍາຄວາມປອດໄພຂໍ້ມູນຂ່າວສານ, ວິທີການຮັກສາຄວາມປອດໄພຂໍ້ມູນຂ່າວສານ, ການປົກປ້ອງຄວາມເປັນສ່ວນຕົວ, ວົງໂຄຈອນຂອງລະບົບຄວາມປອດໄພຂໍ້ມູນຂ່າວສານ. ພ້ອມກັນນັ້ນ, ຜູ້ເຂົ້າຮ່ວມຍັງຈະໄດ້ແລກປ່ຽນສົນທະນາຄໍາຄິດເຫັນລະຫວ່າງນັກຝຶກອົບຮົມດ້ວຍກັນ ແລະ ຜູ້ສິດສອນຈາກຕ່າງປະເທດ ພ້ອມທັງການຕິດຕາມ ວິທີການສ້າງຕັ້ງ ແລະ ດໍາເນີນທີມງານຕອບໂຕ້ເຫດການຄວາມປອດໄພຄອມພິວເຕີແຫ່ງຊາດ (CSIRT) ແລະ ຖອດຖອນບົດຮຽນຈາກແບບຈໍາລອງຂອງ CSIRT ຈາກປະເທດຕ່າງໆ ຕື່ມອີກ.

ບົດຂ່າວ: ສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງ ເຕັກໂນໂລຊີ ແລະ ການສື່ສານ