ສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ເປີດກອງປະຊຸມຝຶກອົບຮົມການສ້າງຄວາມເຂັ້ມແຂງ ທາງດ້ານວຽກງານການຄຸ້ມຄອງ, ການຖ່າຍທອດເຕັກໂນໂລຊີ ແລະ ນະວັດຕະກຳ ເພື່ອສ້າງຄວາມເຂັ້ມແຂງໃຫ້ແກ່ພະນັກງານຄຸ້ມຄອງພະແນກເຕັກໂນໂລຊີ ແລະ ການສື່ສານ (ພຕສ) ຈາກ 18 ແຂວງ ທົ່ວປະເທດ. ຊຸດຝຶກອົບຮົມດັ່ງກ່າວ ໄດ້ຈັດຂຶ້ນໃນຕອນເຊົ້າຂອງວັນທີ 3 ເມສາ 2023 ນີ້, ທີ່ຫ້ອງປະຊຸມໃຫຍ່ ຂອງ ກຕສ (ເຂດດອນຕິ້ວ), ນະຄອນຫຼວງວຽງຈັນ. ໂດຍການເປັນປະທານກ່າວເປີດຂອງ ທ່ານ ປອ. ສັນຕິສຸກ ສິມມາລາວົງ ຮອງລັດຖະມົນຕີ ກຕສ, ມີບັນດາຄະນະກົມ/ທຽບເທົ່າ, ຄະນະພະແນກ ແລະ ພະນັກງານ-ວິຊາການຂອງສູນ ແລະ ນັກສໍາມະນາກອນ ຈາກ ພຕສ ແຂວງເຂົ້າຮ່ວມ ຫຼາຍກວ່າ 60 ທ່ານ.

ຊຸດຝຶກອົບຮົມໃນຄັ້ງນີ້ ຜູ້ເຂົ້າຮ່ວມຈະໄດ້ຮັບຟັງການນໍາສະເໜີກ່ຽວກັບ ພາລະບົດບາດ ແລະ ໜ້າທີ່ການຈັດຕັ້ງປະຕິບັດ ກ່ຽວກັບການຄຸ້ມຄອງເຕັກໂນໂລຊີ ແລະ ນະວັດຕະກຳ, ທັກສະການເປັນຄູຝຶກທີ່ດີ ແລະ ເຕັກນິກການນຳສະເໜີເທິງເວທີ ເພື່ອສ້າງຄວາມເຂັ້ມແຂງໃຫ້ແກ່ພະນັກງານ ພະແນກເຕັກໂນໂລຊີ ແລະ ການສື່ສານ ແຂວງ ໃນການສົ່ງເສີມ ແລະ ຖ່າຍທອດວຽກງານຂະແໜງເຕັກໂນໂລຊີ ແລະ ການສື່ສານ ໃຫ້ກັບພາກສ່ວນຕ່າງໆໄດ້ຮັບຮູ້ ແລະ ເຂົ້າໃຈ ພ້ອມທັງສາມາດນຳໄປຈັດຕັ້ງປະຕິບັດໃຫ້ມີປະສິດທິພາບສູງ. ນອກຈາກນັ້ນ, ຍັງຈະໄດ້ຮັບຟັງການນຳສະເໜີກ່ຽວກັບຄວາມໝາຍຄວາມສຳຄັນ ຂອງທຸລະກິດສະຕາດອັບ (Start up), ແຮງຈູງໃຈຂອງການເຮັດທຸລະກິດສະຕາດອັບ ແລະ ເວທີສົນທະນາກ່ຽວກັບລະບົບນິເວດສະຕາດອັບ ຈາກຜູ້ມີປະສົບການຕົວຈິງ ທີ່ເຮັດທຸລະກິດສະຕາດອັບ ມາຖ່າຍທອດ, ແລກປ່ຽນປະສົບການຕົວຈິງ ແລະ ສິ່ງສໍາຄັນທີ່ສຸດຜູ້ເຂົ້າຮ່ວມຝຶກອົບຮົມຍັງຈະໄດ້ເຂົ້າຮ່ວມກິດຈະກຳຕ່າງໆໃນງານວາງສະແດງ ແລະ ສ້າງຄູ່ຮ່ວມມື ດ້ານເຕັກໂນໂລຊີ ນະວັດຕະກຳ ລາວ-ຫວຽດນາມ 2023 (Tceh-Inovation Laos-Vietnam) ຊຶ່ງຈັດຂຶ້ນໃນລະຫວ່າງວັນທີ 4-5 ເມສາ 2023, ທີ່ສູນການຮ່ວມມືສາກົນ ແລະ ຝຶກອົບຮົມ (ICTC), ນະຄອນຫຼວງວຽງຈັນ ເຊັ່ນ: ເຂົ້າຮ່ວມພິທີເປີດງານວາງສະແດງ, ຢ້ຽມຊົມ ແລະ ເຂົ້າຮ່ວມກອງປະຊຸມສຳມະນາ, ສົນທະນາ ແລະ ກອງປະຊຸມອື່ນໆ ທີ່ປີ່ນອ້ອມ ເພື່ອແລກປ່ຽນບົດຮຽນ, ຊອກຫາຊ່ອງທາງໃນການຮ່ວມມື ແລະ ທັງເປັນການສ້າງໂລກະທັດໃໝ່ ເພື່ອນຳໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງ.

ຊຸດຝຶກອົບຮົມຄັ້ງນີ້ ຈະໄດ້ດໍາເນີນໄປຈົນເຖິງວັນທີ 5 ເມສາ 2023 ຈຶ່ງຈະສໍາເລັດ.

ຂ່າວ: ສູນສົ່ງເສີມ ແລະຖ່າຍທອດເຕັກໂນໂລຊີ.