ໃນຕອນເຊົ້າຂອງວັນທີ 18 ທັນວາ 2024 ສູນສົ່ງເສີມ ແລະ ຖ່າຍທອດເຕັກໂນໂລຊີ (ສຖຕ), ກະຊວງ ເຕັກໂນໂລຊີ ແລະ ການສື່ສານ, ໄດ້ຈັດກອງປະຊຸມຝຶກອົບຮົມ ການນໍາໃຊ້ເຕັກໂນໂລຊີ ທັນສະໄໝ ເພື່ອຂະຫຍາຍທຸລະກິດສະຕາດອັບ ໃຫ້ແກ່ພະແນກ ຕສ ແຂວງຫົວພັນ, ພະແນກອ້ອມຂ້າງ, ນັກທຸລະກິດ ຂອງແຂວງຫົວພັນ ແລະ ນະຄອນຫຼວງວຽງຈັນ, ເຊິ່ງໄດ້ຈັດຂຶ້ນທີ່ ຫ້ອງປະຊຸມຊັ້ນ 1, ສະຖາບັນເຕັກໂນໂລຊີຂໍ້ມູນຂ່າວສານ ແລະ ການສື່ສານ, ກະຊວງເຕັກໂນໂລຊີ ແລະ ການສື່ສານ, ໂດຍໃຫ້ກຽດເຂົ້າຮ່ວມເປັນປະທານ ຂອງ ທ່ານ ນ. ເກສອນ ສຸລິວົງ ຫົວໜ້າສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງ ເຕັກໂນໂລຊີ ແລະ ການສື່ສານ.

ຈຸດປະສົງການໃນການຈັດກອງປະຊຸມດັ່ງກ່າວ ເພື່ອຊຸກຍູ້ສົ່ງເສີມ, ຈັດຝຶກອົບຮົມ ແລະ ເຜີຍແຜ່ ສຳມະນາການນຳໃຊ້ເຕັກໂນໂລຊີທັນສະໄໝ ເພື່ອຂະຫຍາຍທຸລະກິດສະຕາດອັັບ ໃຫ້ພະນັກງານຜູ້ຮັບຜິດຊອບ          ໄດ້ເຂົ້າໃຈຢ່າງເລິກເຊິ່ງໃນວຽກງານ ສະຕາດອັັບ ແລະ ສາມາດນຳໄປເຜີຍແຜ່ຕໍ່ພະນັກງານ-ລັດຖະກອນ ພາຍໃນພະແນກຂອງຕົນໃຫ້ມີຄວາມຮັບຮູ້, ເຂົ້າໃຈ ໂດຍຜ່ານການສຳພັດກັບບັນຍາກາດຕົວຈິງ ຂອງທຸລະກິດຮູບແບບສະຕາດອັບ ຈາກວິທະຍາກອນທີ່ມີປະສົບການໃນການດໍາເນີນທຸລະກິດສະຕາດອັບ ແລະ ຢ້ຽມຍາມ, ທັດສະນະສຶກສາ ທີ່ສໍານັກງານໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ທີ່ມີສະຖານທີ່ເຮັດວຽກຮ່ວມ (Co-working space) ແລະ ຫ້ອງ Pitching ທີ່ໄດ້ມາດຖານລະດັບພາກພື້ນ ແລະ ສາກົນ ຂອງ ບໍລິສັດ ລາວໂທລະຄົມມະນາຄົມ ມະຫາຊົນ (ລລທ) ເພື່ອສາມາດນໍາໄປສົ່ງເສີມວຽກງານດັ່ງກ່າວ, ພ້ອມນີ້ກໍ່ເພື່ອເປັນການສ້າງຄວາມຮູ້ກ່ຽວກັບສະຕາດອັບ ໃຫ້ແກ່ ພະແນກ ຕສ ແຂວງ ຫົວພັນ, ພະແນກອ້ອມຂ້າງ ແລະ ນັກທຸລະກິດ ຢູ່ພາຍໃນ ແຂວງ ຫົວພັນ ແລະ ນະຄອນຫຼວງວຽງຈັນ, ເຊິ່ງງານດັ່ງກ່າວມີຜູ້ເຂົ້າຮ່ວມທັງໝົດ 70 ທ່ານ.

ບົດຂ່າວ ແລະ ຮູບພາບ: ສູນສົ່ງເສີມ ແລະ ຖ່າຍທອດເຕັກໂນໂລຊີ