ສູນສົ່ງ​ເສີມ​ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ ໄດ້ຈັດກອງປະຊຸມເປີດກວ້າງ ເພື່ອທາບທາມຄໍາເຫັນໃສ່ຮ່າງແຜນວຽກລະບົບນິເວດສະຕາດອັບ ຂອງ ສປປ ລາວ ແຕ່ປີ 2024-2030 (Startup Ecosystem Roadmap Lao PDR 2024-2030) ພາຍໃຕ້ໂຄງການກອງທຶນພິເສດຂອບການຮ່ວມມື ແມ່ນນ້ຳຂອງ-ແມ່ນ້ຳລ້ານຊ້າງ ໃນຫົວຂໍ້: “ສ້າງຄວາມເຂັ້ມແຂງດ້ານລະບົບນິເວດສະຕາດອັບ (Startup) ໃນ ສປປ ລາວ, ຫວຽດນາມ ແລະ ໄທ”, ຂຶ້ນໃນຕອນເຊົ້າ ຂອງວັນທີ 20 ທັນວາ 2024, ເວລາ 08:00 ໂມງ, ​ໂດຍໃຫ້ກຽດເຂົ້າຮ່ວມເປັນປະທານກອງປະຊຸມ ຂອງ ທ່ານ ປອ. ສັນຕິສຸກ ສິມມາລາວົງ, ຮອງລັດຖະມົນຕີ, ກະຊວງ ເຕັກໂນໂລຊີ ແລະ ການສື່ສານ, ມີຜູ້ເຂົ້າຮ່ວມທັງໝົດ 40 ທ່ານ. ມີຄະນະສູນ, ຄະນະພະແນກ ແລະ ວິຊາການ ທີກ່ຽວຂ້ອງ ຈາກ ​ສູນສົ່ງ​ເສີມ​ ແລະ ຖ່າຍທອດເຕັກໂນໂລຊີ, ຜູ້ຕາງໜ້າຈາກຫ້ອງການກະຊວງ ຕສ, ຜູ້ຕ່າງໜ້າຈາກສະມາຄົມ SME, ຜູ້ຕາງໜ້າຈາກມະຫາວິທະຍາໄລແຫ່ງຊາດ, ຜູ້ຕ່າງໜ້າຈາກພະແນກ ຕສ ແຂວງ ຫຼວງພະບາງ, ຂະແໜງການຕ່າງໆ ພາຍໃນ ແຂວງ ຫຼວງພະບາງ, ບັນດາບໍລິສັດຜູ້ປະກອບການ ທຸລະກິດສະຕາດອັບ ໃນ ສປປລາວ ແລະ ຜູ້ຕາງໜ້າສະຕາດອັບຈາກ ສສ ຫວຽດນາມ, ຕາງໜ້າສະຕາດອັບຈາກ ຣາຊາອານາຈັກໄທ  ແລະ ບໍລິສັດ ທີ່ປຶກສາໂຄງການ ເຂົ້າຮ່ວມ.

ຈຸດປະສົງຂອງກອງປະຊຸມແມ່ນ ເພື່ອຈັດຕັ້ງຜັນຂະຫຍາຍພາຍໃຕ້ໂຄງການຮ່ວມມືລະດັບພາກພື້ນແມ່ນ້ຳຂອງ-ແມ່ນ້ຳລ້ານຊ້າງ ໃນຫົວຂໍ້ “ສ້າງຄວາມເຂັ້ມແຂງດ້ານລະບົບນິເວດສະຕາດອັບ (Startup) ໃນ ສປປ ລາວ, ຫວຽດນາມ ແລະ ໄທ” ເພື່ອກໍານົດກາລະໂອກາດ ແລະ ສິ່ງທ້າທາຍ ຂອງ ລະບົບນິເວດສະຕາດອັບ ໃນ ສປປ ລາວ, ຫວຽດນາມ ແລະ ໄທ, ຕີລາຄາສະພາບແວດລ້ອມທີ່ເອື້ອອຳນວຍ ທາງດ້ານນະໂຍບາຍການເຂົ້າເຖິງແຫຼ່ງທຶນ, ຄວາມອາດສາມາດ, ສ້າງແຜນການຈັດຕັ້ງປະຕິບັດການຖ່າຍທອດເຕັກໂນໂລຊີ ເປັນຕົ້ນແມ່ນສ້າງສູນບົ່ມເພາະ, ພຶ້ນທີ່ເຮັດວຽກຮ່ວມ ຂອງທຸລະກິດສະຕາດອັບ ຢູ່ ສປປ ລາວ  ແລະ ເພື່ອຜັນຂະຫຍາຍຍຸດທະສາດ ໃນການພັດທະນາເສດຖະກິດດິຈິຕອນ ແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາ ເຕັກໂນໂລຊີ ແລະ ການສື່ສານ ໄລຍະ 5 ປີ, (2021-2025) ຄັ້ງທີ III.

ກອງປະຊຸມເປີດກວ້າງຄັ້ງນີ້ ບັນດາຄະນະຮັບຜິດຊອບຈັດຕັ້ງປະຕິບັດໂຄງການ ແລະ ພະແນກ ຕສ ແຂວງ, ບັນດາບໍລິສັດຜູ້ປະກອບການ ທຸລະກິດສະຕາດອັບ ໃນ ສປປລາວ ແລະ  ສ. ຫວຽດນາມ, ຣາຊາອານາຈັກໄທ  ແລະ ບໍລິສັດ ທີ່ປຶກສາໂຄງການ ທີ່ເຂົ້າຮ່ວມກອງປະຊຸມ ນຳສະເໜີກ່ຽວກັບການສ້າງລະບົບນິເວດສະຕາດອັບ ທີ່ເຂັ້ມແຂງ ໃນ ສປປ ລາວ, ກໍລະນີສຶກສາລະບົບນິເວດສະຕາດອັບຢູ່ ພາກພື້ນ ແລະ ສາກົນ, ລະບົບນິເວດສະຕາດອັບຢູ່ ສປປ ລາວ, ລະບົບນິເວດສະຕາດອັບ ຂອງ ສສ ຫວຽດນາມ, ລະບົບນິເວດສະຕາດອັບ ຂອງຣາຊາອານາຈັກໄທ ແລະ ນຳສະເໜີກ່ຽວກັບຮ່າງແຜນວຽກລະບົບນິເວດສະຕາດອັບ ( Draft Startup Ecosystem Roadmap), ເຊິ່ງຕອນທ້າຍຂອງກອງປະຊຸມດັ່ງກ່າວ ບັນດາຜູ້ເຂົ້າຮ່ວມກອງປະຊຸມ ໄດ້ພ້ອມກັນເອົາໃຈໃສ່ຄົ້ນຄວ້າບັນດາເອກະສານຕ່າງໆ ໃຫ້ລະອຽດເລິກເຊີ່ງ ພ້ອມທັງປະກອບຄຳຄິດຄຳເຫັນແບບພາວະວິໃສ ເພື່ອໃຫ້ສາມາດມີຂໍ້ມູນຄົບຖ້ວນ ເພື່ອນຳໄປປັບປຸງບັນດາເນື້ອໃນເອກະສານໃຫ້ສົມບຸນ ແລະ ສາມາດສ້າງແຜນວຽກລະບົບນິເວດສະຕາດອັບ ຂອງ ສປປ ລາວ ແຕ່ປີ 2024-2030 (Startup Ecosystem Roadmap Lao PDR 2024-2030)  ໃຫ້ໄປຕາມເປົ້າໝາຍທີ່ກໍານົດໄວ້ ຂອງໂຄງການ, ເພາະບັນດາແຜນວຽກທີ່ຖືກກຳນົດອອກມາພາຍໃຕ້ກອບ ຂອງໂຄງການດັ່ງກ່າວນີ້ ແມ່ນຈະກາຍເປັນຂໍກະແຈ (Keyword) ສຳຄັນໃນການຂັບເຄື່ອນວຽກງານສະຕາດອັບໃຫ້ໄປຕາມແຜນວຽກທີ່ກໍານົດໄວ້ຢ່າງມີປະສິດທິພາບ ແລະ ປະສິດທິຜົນສູງ.

ບົດຂ່າວ ແລະ ຮູບພາບໂດຍ: ສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ.