ກອງປະຊຸມທ້າຍສະໄໝ ຂອງໜ່ວຍພັກສູນສົ່ງ​ເສີມ​ ແລະ ຖ່າຍທອດເຕັກໂນໂລຊີ (ສຖຕ), ກະຊວງເຕັກໂນໂລຊີ ແລະ ການສື່ສານ ໄດ້ໄຂຂຶ້ນໃນຕອນບ່າຍ ຂອງວັນທີ 21 ມັງກອນ 2025, ທີ່ຫ້ອງປະຊຸມຊັ້ນ 1, ເຂດດອນຕີ້ວ, ກະຊວງເຕັກໂນໂລຊີ ແລະ ການສື່ສານ. ໂດຍໃຫ້ກຽດເປັນປະທານໂດຍ ສະຫາຍ ປະລີນຍາເອກ ສັນຕິສຸກ ສິມມາລາວົງ, ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ, ກະຊວງ ເຕັກໂນໂລຊີ ແລະ ການສື່ສານ, ມີເລຂາ  ໜ່ວຍພັກ, ຄະນະໜ່ວຍພັກ, ສະມາຊິກພັກສົມບູນ ຂອງໜ່ວຍພັກ ສຖຕ ແລະ ຄະນະຕິດຕາມກອງປະຊຸມທີມາຈາກ ກົມຈັດຕັ້ງ ແລະ ພະນັກງານ ແລະ ກົມກວດກາ ເຂົ້າຮ່ວມທັງໝົດ ຈຳນວນ 25 ສະຫາຍ, ຍິງ 10 ສະຫາຍ.

ກອງປະຊຸມຄັ້ງນີ້ ໄດ້ດຳເດີນໄປດ້ວຍບັນຍາກາດອັນຟົດຟື້ນ, ມີເນື້ອໃນຄົບຖ້ວນສົມບູນ, ເລິກເຊິ່ງ ແລະ ບັນລຸຕາມຈຸດປະສົງ ແລະ ເປົ້າໝາຍທີ່ວາງໄວ້. ຈຸດປະສົງຂອງກອງປະຊຸມ ແມ່ນເພື່ອຕີລາຄາປະກອບຄໍາເຫັນຕໍ່ບົດສະຫຼຸບການນໍາພາ-ຊີ້ນໍາ ການຈັດຕັ້ງປະຕິບັດວຽກງານໄລຍະຜ່ານມາ ແລະ ແຜນການໃນສະໄໝຕໍ່ໜ້າ ຂອງໜ່ວຍພັກສູນສົ່ງ​ເສີມ​ ແລະ ຖ່າຍທອດເຕັກໂນໂລຊີ. ກອງປະຊຸມໃນຄັ້ງນີ້, ສະຫາຍ ນ. ເກສອນ ສຸລິວົງ, ຄະນະພັກກະຊວງ, ເລຂາໜ່ວຍພັກ, ຫົວໜ້າສູນສົ່ງ​ເສີມ​ ແລະ ຖ່າຍທອດເຕັກໂນໂລຊີ ໄດ້ຂຶ້ນຜ່ານຮ່າງບົດສໍາຫຼວດການນໍາພາລວມໄລຍະທ້າຍສະໄໝແຕ່ປີ 2021-2025 ແລະ ທິດທາງແຜນການ 2026-2030, ບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2024 ແລະ ທິດທາງແຜນການກໍ່ສ້າງໜ່ວຍພັກປີ 2025. ພ້ອມນັ້ນ, ຍັງໄດ້ມີການປະກອບຄໍາຄິດຄໍາເຫັນຢ່າງກົງໄປກົງມາຕໍ່ການນໍາພາລວມຂອງຄະນະໜ່ວຍພັກ ແລະ ການປະເມີນຜົນງານຂອງຄະນະສູນ, ແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ ຂອງບັນດາສະຫາຍຄະນະໜ່ວຍພັກ, ສະມາຊິກພັກ ໃຫ້ຖືກຕ້ອງຕາມຄວາມເປັນຈິງພາວະວິໄສ ແລະ ດໍາເນີນຖືກຕ້ອງຕາມຫຼັກການຂອງພັກ.

ກອງປະຊຸມ ໄດ້ຮັບກຽດຮັບຟັງການມີຄຳເຫັນໂອ້ລົມ ຂອງສະຫາຍ ປະລີນຍາເອກ ສັນຕິສຸກ ສິມມາລາວົງ, ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ, ກະຊວງ ເຕັກໂນໂລຊີ ແລະ ການສື່ສານ ສະຫາຍສະແດງໃຫ້ເຫັນເຖິງຄວາມເປັນຫ່ວງເປັນໃຍ ແລະ ຄວາມເອົາໃຈໃສ່ ຂອງຄະນະພັກ ກະຊວງ ເຕັກໂນໂລຊີ ແລະ ການສື່ສານ ກໍຄື ຕໍ່ການພັດທະນາວຽກງານ ສົ່ງເສີມ ແລະ ຖ່າຍທອດເຕັກໂນໂລຊີ ເຊິ່ງເປັນວຽກງານຈຸດສຸມໜຶ່ງ ຂອງຂະແໜງເຕັກໂນໂລຊີ ແລະ ການສື່ສານ ໃນການຫັນເປັນດິຈິຕອນ ເພື່ອລຶບລ້າງການກຶກດິຈິຕອນໃນທົ່ວສັງຄົມ. ພ້ອມນີ້, ສະຫາຍຍັງໄດ້ເນັ້ນໜັກໃຫ້ເອົາໃຈໃສ່ວຽກງານສຶກສາອົບຮົມດ້ານການເມືອງແນວຄິດໃຫ້ແກ່ສະມາຊິກພັກ, ພະນັກງານ-ລັດຖະກອນ ໃຫ້ມີຄວາມຮັບຮູ້ຢ່າງກວ້າງຂວາງ, ປັບປຸງ ແລະ ກໍ່ສ້າງພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ກໍ່ສ້າງສະມາຊິກພັກ, ພະນັກງານ-ລັດຖະກອນ ໃຫ້ມີລະດັບຄວາມຮູ້ທາງດ້ານທິດສະດີການເມືອງ ມີຄວາມຮູ້ທາງດ້ານວິຊາສະເພາະຢ່າງໜັກແໜ້ນ ໃນການສົ່ງເສີມການຖ່າຍທອດເຕັກໂນໂລຊີ, ການສົ່ງເສີມທຸລະກິດສະຕາດອັບ ແລະ ສົ່ງເສີມເຂດເຕັກໂນໂລຊີ ໃຫ້ມີຜົນສຳເລັດເປັນຢ່າງດີ ມີໄຊຊະນະໄໝ່ ຍິ່ງໃຫ່ຍກວ່າເກົາ.

ກອງປະຊຸມໄດ້ປິດລົງໃນເວລາ 17:00 ຂອງມື້ດຽວກັນ

ເນື້ອໃນ ແລະ ບົດຂ່າວໂດຍ: ສູນສົ່ງເສີມ ແລະ ຖ່າຍທອດເຕັກໂນໂລຊີ