ກອງປະຊຸມທາບທາມບຸກຄະລາກອນ ອອກສະໝັກຮັບເລືອກຕັ້ງ ຮອບທີ II ຂອງໜ່ວຍພັກຮາກຖານສູນສົ່ງເສີມ ແລະ ຖ່າຍທອດເຕັກໂນໂລຊີ, ກະຊວງເຕັກໂນໂລຊີ ແລະ ການສື່ສານ ໄດ້ໄຂຂຶ້ນໃນຕອນບາຍຂອງວັນທີ 27 ມັງກອນ 2025, ທີ່ຫ້ອງປະຊຸມຊັ້ນ 1, ເຂດດອນຕີ້ວ, ກະຊວງເຕັກໂນໂລຊີ ແລະ ການສື່ສານ. ໂດຍໃຫ້ກຽດເປັນປະທານໂດຍ ສະຫາຍ ປະລີນຍາເອກ ສັນຕິສຸກ ສິມມາລາວົງ, ຮອງເລຂາອົງຄະນະພັກກະຊວງ, ຮອງລັດຖະມົນຕີ, ກະຊວງ ເຕັກໂນໂລຊີ ແລະ ການສື່ສານ, ມີເລຂາໜ່ວຍພັກ, ຄະນະໜ່ວຍພັກ, ສະມາຊິກພັກສົມບູນ ຂອງໜ່ວຍພັກ ສຖຕ ແລະ ຕາງໜ້າຜູ້ຕິດຕາມຈາກ ກົມກວດກາ ແລະ ກົມຈັດຕັ້ງ ແລະ ພະນັກງານ ເຂົ້າຮ່ວມທັງໝົດ ຈຳນວນ 23 ສະຫາຍ, ຍິງ 11 ສະຫາຍ.

ຈຸດປະສົງຂອງກອງປະຊຸມ ແມ່ນ ເພື່ອທາບທາມບຸກຄະລາກອນ ອອກສະໝັກຮັບເລືອກຕັ້ງ ຮອບທີ II ຂອງໜ່ວຍພັກຮາກຖານສູນສົ່ງເສີມ ແລະ ຖ່າຍທອດເຕັກໂນໂລຊີ  ແລະ ຍັງໄດ້ຮັບຟັງ ຄະນະໜ່ວຍພັກຮາກຖານສູນສົ່ງ​ເສີມ​ ແລະ ຖ່າຍທອດເຕັກໂນໂລຊີ  ຂຶ້ນຜ່ານຮ່າງບົດລາຍງານການເມືອງ ແລະ ຮ່າງບົດສຳຫຼວດການນຳພາລວມ ຂອງຄະນະໜ່ວຍພັກສູນສົ່ງເສີມ ແລະ ຖ່າຍທອດເຕັກໂນໂລຊີ ແລະ ຮັບຟັງການໂອ້ລົມ ແລະ ມີທິດຊີ້ນຳຈາກ ສະຫາຍ ປະທານກອງປະຊຸຸມ ເພື່ອເປັນທິດຊີ້ນໍາ ໃນການຈັດຕັ້ງປະຕິບັດການທາບທາມບຸກຄະລາກອນອອກຮັບສະຫມັກເປັນເປົ້າຫມາຍ

 ໃນການເລືອກຕັ້ງເປັນຄະນະຫນ່ວຍພັກຊຸດໃຫມ່ຂອງໜ່ວຍພັກຮາກຖານ ສູນສົ່ງເສີມ ແລະ ຖ່າຍທອດເຕັກໂນໂລຊີ ດ້ວຍຄວາມຮັບຜິດຊອບສູງເພື່ອຮັບປະກັນໃຫ້ສາມາດຄັດເລືອກເອົາຜູ້ທີ່ມີບົດຮຽນ, ຄວາມຮູ້ຄວາມສາມາດ, ມີມາດຖານ ແລະ ເງື່ອນ ໄຂຄົບຖ້ວນ ໃນການນຳພາ-ຊີ້ນຳວຽກງານພັກ, ວຽກງານລັດ ໃນສະໄຫມຫນ້າຢ່າງມີປະສິດທິພາບ ແລະ ປະສິດຜົນສູງ.

ໃນກອງປະຊຸມ ສະຫາຍ ປະລິນຍາເອກ ສັນຕິສຸກ ສິມມາລາວົງ, ຮອງເລຂາອົງຄະນະພັກກະຊວງ, ຮອງລັດຖະມົນຕີ, ກະຊວງ ເຕັກໂນໂລຊີ ແລະ ການສື່ສານ, ຍັງໄດ້ຮັບຟັງໂອ້ລົມ ແລະ ໃຫ້ທິດຊີ້ນໍາ ຕໍ່ກອງປະຊຸມ ຊຶ່ງທ່ານໄດ້ ເນັ້ນໜັກໃຫ້ສະມາຊິກພັກທຸກສະຫາຍ ເອົາໃຈໃສ່ ໃນການໃຊ້ສິດປະຊາທິປະໄຕ  ໃນການຄັດເລືອກບຸກຄະລາກອນ ເພື່ອມາບໍລິຫານວຽກພັກ ແລະ ຊີ້ນຳວຽກລັດ ໃນກອງປະຊຸມທາບທາມບຸກຄະລາກອນ ອອກສະໝັກຮັບເລືອກຕັ້ງ ຮອບທີ  II  ຂອງໜ່ວຍພັກຄັ້ງນີ້. ຈົ່ງມີສະຕິໃນການຄັດເລືອກ ໂດຍໃຫ້ເບິ່ງແບບພາວະວິໃສ, ເປັນກາງ ບໍ່ໃຫ້ມີແນວຄິດອັກຄະຕິ ຈຸ້ມເຈື້ອ ເຊື້ອສາຍ ເບິ່ງລະອຽດຜູ້ທີ່ຈະມານຳພາ-ຊີ້ນຳການຈັດຕັ້ງພັກ ຂອງສູນສົ່ງເສີມ ແລະ ຖ່າຍທອດເຕັກໂນໂລຊີ ໃຫ້ເຕີບໃຫຍ່ຂະຫຍາຍຕົວ ແລະ ເຂັ້ມແຂງຢ່າງບໍ່ຢຸດຢັ້ງ.

ກອງປະຊຸມຂອງພວກເຮົາຈະດຳເນີນໄປດ້ວຍຄວາມຮັບຜິດຊອບສູງ ຂອງສະຫາຍສະມາຊິກພັກ ເພື່ອສຸມສະຕິປັນຍາຂອງຕົນ ຄົ້ນຄວ້າປະກອບຄຳຄິດຄຳເຫັນ ແລະ ກ້າວໄປເຖິງຄວາມເປັນເອກະພາບ ແລະ ຮັບຮອງເອົາທຸກເນື້ອໃນຂອງກອງປະຊຸມ ໂດຍສະເພາະການທາບທາມບຸກຄະລາກອນ ອອກສະໝັກຮັບເລືອກຕັ້ງ ຮອບທີ II ແນ່ໃສ່ເຮັດໃຫ້ການດຳເນີນກອງປະຊຸມທາບທາມໃນຄັ້ງນີ້ ບັນລຸຜົນສຳເລັດຕາມຄາດໝາຍທີ່ວາງໄວ້.

ຮູບພາບ ແລະ ບົດຂ່າວໂດຍ: ສູນສົ່ງເສີມ ແລະ ຖ່າຍທອດເຕັກໂນໂລຊີ